Peskiza

Foku jerál peskiza nian mak kona-ba prosesu harii nasaun iha Timor-Leste. Peskiza konsentra liuliu ba períodu hahú hosi 1999, bainhira ita haree nasaun-estadu ida mosu daudaun. Ami mantein nafatin interese ida kona-ba kolonializmu Portugés no okupasaun Indonézia tanba sira bele ajuda ita komprende Timor-Leste nia karakter kontemporáneu.

Ho foku ida ba períodu pozkoloniál, ami-nia peskiza hakat liu dixiplina siénsia polítika, sosiolojia, no antropolojia, bainhira ami estuda natureza kruza malu entre padraun hosi integrasaun sosiál oioin no transformasaun: lisan, tradisaun, modernu no pozmodernu.

Hosi área foku rua sira-ne’e—era independénsia nian no transformasaun sosiál—ami iha tendénsia atu konsentra liu ba tema tolu ne’ebé namka’it ba malu: identidade no mudansa, komunidade no organizasaun polítika, seguransa no sustentabilidade.

Identidade no Mudansa

Tranzisaun sira hosi kolónia ida ba territóriu okupadu, tuirfali ba territóriu ida iha ONU nia administrasaun okos no ikusliu ba nasaun-estadu ida, ida-idak hatún impaktu boot ba padraun identidade Timor-Leste nian. Kruza malu ho tranzisaun polítika jerál sira-ne’e mós iha mudansa barak no irregulár entre padraun integrasaun sosiál sira ne’ebé ami refere ba hanesan ‘lisan’, ‘tradisionál’, no ‘modernu’. Porezemplu, enkuantu katak Portugés sira efetivamente limita modernizasaun nia efeitu ba elite nia nivel, Indonézia nia tentativa sira fali mosu ho violénsia maka’as hodi garante dominasaun no tranzisaun kompletu liu ba Timor-Leste nia sosiedade. Iha períodu kontemporáneu, maski iha ezijénsia foun ba Timoroan sira atu husik lisan hodi bele garante sustentabilidade ba nasaun-estadu modernu, maibé lisan sei nafatin hun importante ida ba padraun modernu sira-nia lejitimidade. Tensaun hirak ne’e kona-ba padraun ba identidade nia formasaun, no oinsá sira bele influensia liuliu karakter hosi nasaun nia formasaun iha Timor-Leste, sai kestaun prinsipál ba Programa Peskiza Timor-Leste.

Maski tema jerál sira-ne’e hamosu projetu peskiza no análize suplementár oioin, inklui mós kona-ba dezenvolvimentu, seguransa no justisa, maibé área importante ida ba peskiza mak jéneru. Projetu barak ho komunidade lokál, ONG no organizasaun internasionál oioin buka ona atu rejista no komprende oinsá ema iha Timor-Leste haree jéneru nu’udar identidade, liuliu iha kontestu relasaun sosiál Timor nian ne’ebé sai modernu badadaun. Dala barak jéneru sai foku ba tensaun bainhira iha mudansa no distúrbiu sosiál maka’as, ne’eduni ami-nia servisu haree liuliu ba oinsá mak programa sira kona-ba jéneru fó impaktu ba komunidade lokál sira.

Komunidade no Organizasaun Polítika

Peskiza haree liuliu atu komprende komunidade nia forma rua: dahuluk, iha nivel ambiente komunidade lokál liu hanesan aldeia; no, daruak, iha nivel abstratu liután, katak komunidade iha nivel nasaun nian. Iha nivel rua sira-ne’e ami husu oinsá komunidade ida harii—saida mak halo ema identifika no integra ba sentidu ruma kona-ba komunidade? Iha nivel lokál, ami haree komunidade barak iha Timor-Leste ne’ebé organiza an tuir autoridade hosi lisan no tradisaun, dala barak ho prezensa ki’ik liu hosi estadu ka forma institusionál modernu seluseluk. Ne’e hahú muda, maski ho dalan la hanesan, bainhira sentru rurál sira hetan konsolidasaun ba forma nasionál, liuliu iha sentru urbanu sira hanesan Dili.

Kestaun kona-ba organizasaun polítika mosu iha peskiza hanesan maneira ida hodi husu kona-ba natureza relasaun podér nian iha sosiedade laran—la’ós de’it iha nivel lisan, tradisionál ka modernu, maibé mós natureza hosi kruza malu entre nivel sira-ne’e. Buat ne’e habele ita atu husu kona-ba natureza relasaun sosiál nian ne’ebé muda badadaun iha forma komunidade diferente sira-nia laran, no se karik komunidade sira ne’ebé lokalizadu liu iha relasaun direta maka’as liu hosi ema ba ema ka komunidade nasionál abstratu ne’ebé estadu domina.

Seguransa no Rekonsiliasaun

Ho enkuadramentu hosi tema rua iha leten—‘Identidade no Mudansa’ no “Komunidade no Polity—peskiza barak konsentra ba padraun konflitu no rezolusaun nian.

Seguransa hetan tratamentu jerál liu duké buat ne’ebé dala barak refere ba ho termu sira hanesan ‘setór seguransa’, no iha-ne’e relasiona liu ba sentidu subjetivu kona-ba risku ka ameasa hosi ema iha sira-nia moris loroloron envezde konsentra ba oinsá meius violénsia sira iha Timor-Leste hetan kontrole ka institusionalizasaun. Rekonsiliasaun mós foka liu ba posibilidade jerál ida iha Timor-Leste nia sosiedade hodi kria, adapta no mantein padraun komunidade nian iha períodu hafoin independénsia. Peskiza ne’e kona-ba ‘seguransa no rekonsiliasaun’ kaer foku báziku rua.

Iha nivel nasionál, knaar hosi prosesu Verdade no Rekonsiliasaun sai konsiderasaun prinsipál, hosi sorin ida nu’udar prosesu ida hosi área luan justisa tranzisaun nian ne’ebé buka atu hakotu síklu violénsia no konflitu nian. Área daruak importante ba peskiza iha nivel nasionál kona-ba prosesu harii estadu, liuliu iha kontestu krize polítika no sosiál iha tinan 2006-2008, ho énfaze ida ba oinsá tentativa atu harii mekanizmu governasaun foun hafó impaktu hodi rezolve divizaun sira iha nasaun foun ne’e.

Iha nivel komunidade lokál nian, peskiza nia foku ba atu komprende oinsá komunidade sira ne’ebé hasoru dezafiu boot konsege la’o nafatin ba oin; katak oinsá sira konsege rezolve ho maneira sustentavel dezafiu loroloron nian no iha jerál padraun oioin kona-ba integrasaun sosiál. Análize nia foku ida-ne’e konsentra liu ba prosesu lokál sira kona-ba rezolusaun konflitu, produsaun, mobilidade no istória hodi haree ba durabilidade hosi komunidade nia forma sira-ne’e, liuliu hafoin migrasaun forsada durante okupasaun Indonézia no mudansa sosiál maka’as iha Timor-Leste kontemporáneu.

Tema rua sira-ne’e namka’it mós ho nosaun kona-ba sustentabilidade, temátika ida ne’ebé sai hanesan aspetu sentrál ba servisu hosi Globalism Research Centre no mós Global Cities Institute iha Universidade RMIT iha fatin oioin iha rejiaun Ázia-Pasífiku laran. Hodi liafuan ‘sustentabilidade komunitária’ ami refere ba maneira sira oinsá komunidade sira hamriik ho forma ne’ebé duravel no koerente durante períodu tempu ida nia laran, mezmu bainhira hasoru dezafiu boot no durante períodu mudansa maka’as.